ချယ်လ်ဆီးအသင်းကနေ ထွက်ခွာဖို့ အရိပ်အယောင်ပြလာတဲ့ ကူကူရယ်လာ
မာ့ခ် ကူကူရယ်လာက ချယ်လ်ဆီးအသင်းကနေ ထွက်ခွာဖို့ စဉ်းစားနေတဲ့ နောက်ဆုံးကစားသမားဖြစ်လာပြီး သူ့ရဲ့ကလပ်ဟောင်း ဘာစီလိုနာအသင်းဆီ ပြန်ခွင့်ရမယ်ဆိုရင် ငြင်းပယ်ဖို့ ခက်ခဲလိမ့်မယ်လို့ ဝန်ခံပြောကြားခဲ့ပါတယ်။
အသက် ၂၇ နှစ်အရွယ်ရှိပြီဖြစ်တဲ့ ဒီကစားသမားဟာ ၂၀၂၂ ခုနှစ်မှာ Clearlake Capital က အသင်းကို လွှဲပြောင်းရယူခဲ့ပြီးနောက်ပိုင်း ချယ်လ်ဆီးရဲ့ အပြောင်းအရွှေ့တွေထဲမှာ အောင်မြင်မှုရခဲ့တဲ့ အနည်းငယ်သော ကစားသမားတွေထဲက တစ်ယောက်လည်း ဖြစ်ပါတယ်။
Flashscore နဲ့ ပြုလုပ်ခဲ့တဲ့ အင်တာဗျူးမှာ ကူကူရယ်လာက သူဟာ လန်ဒန်မှာ ပျော်ရွှင်နေဆဲဖြစ်တယ်လို့ အခိုင်အမာ ပြောကြားခဲ့ပေမဲ့ သူ့ရဲ့ ငယ်ဘဝကလပ် ဘာစီလိုနာအသင်းဆီ ပြန်နိုင်မယ့် အခွင့်အရေးအတွက်တော့ လမ်းဖွင့်ပေးထားခဲ့ပါတယ်။
"အသင်းဟောင်းဆီ ပြန်ဖို့ဆိုတာကတော့ အမြဲတမ်း စဉ်းစားမိတာပေါ့။ ကျွန်တော်ရော ကျွန်တော့်မိသားစုပါ လန်ဒန်နဲ့ ချယ်လ်ဆီးမှာ အများကြီး ပျော်ရွှင်နေပါတယ်။ အခုကနေ နောက်ထပ် နှစ်အနည်းငယ်လောက်အထိတော့ ဒီမှာပဲ ဆက်ရှိနေဦးမှာပါ" လို့ သူက ဆိုပါတယ်။
ဘာစီလိုနာအသင်းအကြောင်း မေးမြန်းတဲ့အခါမှာတော့ သူက "တကယ်လို့ အဲဒီလို အခြေအနေမျိုးတွေ ဖြစ်လာခဲ့ရင် ငြင်းပယ်ဖို့ တကယ်ကို ခက်ခဲပါလိမ့်မယ်။ အဲဒါကို ကျွန်တော် သေချာစဉ်းစားရမှာဖြစ်သလို မိသားစုနဲ့လည်း တိုင်ပင်ရမှာပါ။ အခုလောလောဆယ်တော့ အဲဒီအကြောင်း မစဉ်းစားသေးပါဘူး။ တကယ်လို့ အဲဒီလို ဖြစ်လာခဲ့မယ်ဆိုရင်တော့ ဘယ်လိုဆုံးဖြတ်မလဲဆိုတာ စောင့်ကြည့်ရမှာပါ" လို့ ပြန်လည်ဖြေကြားခဲ့ပါတယ်။
အသင်းရဲ့ ကွင်းလယ်လူ အန်ဇိုဖာနန်ဒက်ဇ်ကလည်း ရီးရဲလ်မက်ဒရစ်အသင်းဆီ ပြောင်းရွှေ့နိုင်တဲ့ အခြေအနေတွေနဲ့ ပတ်သက်ပြီး ထုတ်ဖော်ပြောဆိုထားသလို၊ ကိုးလ်ပါးလ်မားကလည်း စတန်းဖို့ဒ်ဘရစ်ချ်မှာ မပျော်မရွှင် ဖြစ်နေတယ်လို့ သတင်းတွေ ထွက်ပေါ်နေပါတယ်။
