အင်္ဂလန်နဲ့ နော်တင်ဟမ်ဖောရက်စ်အသင်းရဲ့ ကွင်းလယ်လူ အဲလီးယပ် အန်ဒါဆန်ဟာ ဂျပန်အသင်းနဲ့ ကစားမယ့် ခြေစမ်းပွဲမတိုင်ခင်မှာ စကားပြောဆိုခဲ့ပါတယ်။

ဒီနွေရာသီမှာ အမေရိကန်၊ မက္ကဆီကိုနဲ့ ကနေဒါတို့မှာ ကျင်းပမယ့် ကမ္ဘာ့ဖလားပြိုင်ပွဲမတိုင်ခင် နောက်ဆုံးခြေစမ်းပွဲတွေထဲက တစ်ပွဲအဖြစ် အင်္ဂလန်နဲ့ ဂျပန်တို့ဟာ ဝင်ဘလေကွင်းမှာ ရင်ဆိုင်ကစားကြမှာ ဖြစ်ပါတယ်။

ပြီးခဲ့တဲ့ သောကြာနေ့ညက ဥရုဂွေးနဲ့ တစ်ဂိုးစီ သရေကျခဲ့ပြီးနောက် အင်္ဂလန်အသင်းဟာ ဂျပန်နဲ့ပွဲမှာ လူစာရင်းကို အပြောင်းအလဲ အများကြီးလုပ်သွားမှာပါ။ ဒါဟာ နည်းပြ သောမတ်စ်တူချယ်ရဲ့ လက်အောက်မှာ ဝင်ဘလေကွင်းအတွင်း ရှုံးပွဲမရှိစံချိန်ကို ဆက်ထိန်းနိုင်ဖို့ ရည်ရွယ်တာလည်း ဖြစ်ပါတယ်။

တူချယ်အတွက် အဓိကကစားသမား ဖြစ်လာမယ့် အန်ဒါဆန်က ကမ္ဘာ့ဖလား ပထမဆုံးပွဲစဉ်မှာ အင်္ဂလန်ရဲ့ အမှတ် (၆) ကွင်းလယ်ခံစစ်နေရာကနေ ပွဲထွက်ခွင့်ရဖို့ ယုံကြည်မှုရှိလားဆိုတာနဲ့ အာဆင်နယ်ကြယ်ပွင့် ဒီကလန်ရိုက်စ်နဲ့ ကွင်းလယ်မှာ အတွဲညီပုံတွေအကြောင်း အခုလို ပြောပြခဲ့ပါတယ်။

"ကျွန်တော် အဲဒီနေရာမှာ ကစားချင်တာပေါ့။ ဖောရက်စ်နဲ့ ကစားဖို့ ရာသီတစ်ခုလုံး ကျန်သေးသလို အချိန်တွေလည်း အများကြီး ရှိပါသေးတယ်။ ကျွန်တော့်ရဲ့ ခြေစွမ်းကို အကောင်းဆုံး ထိန်းထားပြီး ဖြစ်လာအောင် ကြိုးစားသွားမှာပါ" လို့ သူက ဆိုပါတယ်။

ဒီကလန်ရိုက်စ်နဲ့ ပတ်သက်ပြီးတော့လည်း "တကယ်ကို ကောင်းပါတယ်။ ကျွန်တော် ဒီကို ရောက်ကတည်းက သူက ကျွန်တော့်ကို သက်သောင့်သက်သာရှိအောင် ကူညီပေးတယ်၊ အလုပ်ထဲမှာတင် သင်ယူနိုင်အောင်လည်း ကူညီပေးပါတယ်။ ကွင်းထဲက ကျွန်တော်တို့နှစ်ယောက်ရဲ့ ဆက်ဆံရေးက တကယ်ကို ကောင်းမွန်ပါတယ်" လို့ ပြောပါတယ်။

"ကွင်းထဲမှာရော ကွင်းပြင်ပမှာပါ သူ့ရဲ့ ကစားဟန်တွေကို ကြည့်ပြီး ကျွန်တော် သင်ယူဖို့ ကြိုးစားနေပါတယ်" လို့လည်း ဆိုပါတယ်။

နိုင်ငံတကာပွဲစဉ်တွေအတွက် အနားမယူခင်မှာ စပါးကို ၃ ဂိုး ဂိုးမရှိနဲ့ နိုင်ခဲ့ပြီးနောက် ဖောရက်စ်ဟာ အဆင့် ၁၆ ထိ တက်လှမ်းနိုင်ခဲ့ပါတယ်။ အန်ဒါဆန်ကို မန်ချက်စတာယူနိုက်တက်နဲ့ ဆက်တိုက် သတင်းထွက်နေတာကြောင့် အနာဂတ်အတွက် စိတ်အနှောင့်အယှက် ဖြစ်နေလားလို့ မေးတဲ့အခါမှာတော့-

"ဒီနွေရာသီမှာ ကျွန်တော်တို့ ကမ္ဘာ့ဖလား ကစားရမှာပါ။ ကျွန်တော့်ရဲ့ အာရုံစိုက်မှုက အဲဒီမှာပဲ ရှိပါတယ်။ အင်္ဂလန်အတွက် ကစားပေးနေပြီး အင်္ကျီပေါ်မှာ အသင်းတံဆိပ်ရှိနေတဲ့အချိန်မှာ ဒါကိုပဲ ကျွန်တော် အလေးထားပါတယ်" လို့ ဖြေကြားခဲ့ပါတယ်။

တန်းဆင်းဇုန်တိုက်ပွဲနဲ့ ပတ်သက်လို့လည်း "ပွဲတိုင်းက အတူတူပါပဲ၊ ကျွန်တော် ကွင်းထဲဆင်းပြီး အကောင်းဆုံး ကြိုးစားသွားမှာပါ။ ဘယ်အသင်းရဲ့ အင်္ကျီကိုပဲ ဝတ်ထားပါစေ၊ အဲဒီအတွက် ကျွန်တော် အစွမ်းကုန် တိုက်ပွဲဝင်သွားမှာပါ" လို့ ပြောပါတယ်။

အင်္ဂလန်ဟာ ဥရုဂွေးနဲ့ သရေကျခဲ့တာကြောင့် ပြီးခဲ့တဲ့ ၁၄ နှစ်အတွင်းမှာ တတိယအကြိမ်မြောက်အဖြစ် နှစ်တစ်နှစ်ရဲ့ အဖွင့်ပွဲစဉ်မှာ အနိုင်မရခဲ့တာ ဖြစ်ပါတယ်။ ကမ္ဘာ့ဖလားမတိုင်ခင် ယုံကြည်မှု တည်ဆောက်နိုင်ဖို့အတွက် ဂျပန်နဲ့ပွဲမှာတော့ အင်္ဂလန်တို့ အနိုင်ရလိမ့်မယ်လို့ မျှော်လင့်ရပါတယ်။